Te Akomanga Tekau ma Wha: Ki mai nei ko te Wharehuia

Kī Mai nei a Te Wharehuia

(He ngeri mō te reo Māori)

Nā Tā Tīmoti Kāretu

Kī mai nei a Te Wharehuia

‘Whakahokia mai! Whakahokia mai!

Mai i te mata o te pene ki te mata o te arero

Kei noho kau noa hei reo mō te pepa, te pene

Tē titi kē ai ki te poho, ki te ngākau aroha’

/ Inā moe ko te tipu ki te whenua

Ka kore ko te pūāwai, te manahua

Inā toua ki te one haumako, ki te ngākau o te tangata

Me pēhea e kore ai e tūperepere, e pāhau tea

E rangona ai tō kakara, e tōku reo, e ō iwi puta noa

I Te Waka, i Te Ika a Māui tikitiki-a-Taranga e takoto nei?

He aha te aha ka pahawa i te uapare? He kore! He kore! He kore!

He aha te aha ka pahawa i te hurikiko? He nui! He nui! He nui!

Tēnā kia whakatōrea ake – kia whati mai ko te tai pari ki uta me pao

Waihoki kainga te kai kei ao ake te rā, he tau nihoroa

Engari kē ia me tau hāwere, me tau pōike, tau atu, tau atu

Kei tōku reo, auraki mai rā, waihape mai rā

Ki tōku poho, ki tōku ngākau, ki tōku arero, ki tōku katoa

Kia ora tonu ai koe i ngā tau tini, tau mano

Mō te ake, ake, haere ake nei. Hei!