E noho Ngā Wai Hono

Ara Tīhei Mauri Ora,

E noho Ngā Wai Hono te hiri o Waikato
E huri tō kanohi ki te Hau-ā-uru
Ngā tai e ngunguru i waho o Te Akau
Auē hei auē!

Tō pikitanga ko te ao o te rangi
Tō heketanga ko Karioi maunga
Tō hoenga waka ko Whaingāroa
Auē hei auē!

Takahia atu rā te moana i Aotea
Kia whatiwhati koe i te hua o te miro
Te tihi o Moerangi te puke okiokinga
Auē hei auē!

Puia ō mata ki Kāwhia Moana
Ki Kāwhia Kai, ki Kāwhia Tangata
Ko te kupu tēnā a ō tūpuna
Auē hei auē!

E huri tō kanohi ki Pirongia maunga

Ki te rohe pōtae ki Arekahanara

Ko te haona kaha o te Rungarunga rawa

Auē, hei auē!

 

Pākia ō ringa ki te Kauhanganui

Te Paki o Matariki, ngā whakaoti

Ko Kemureti rā tōna oko horoi

Auē hei auē!

 

E tū tō wae ki te kei o Tainui

Tēnei tō hoe, ko te Tekau-mā-rua

Ngā tai e marino i waho o Kārewa

Auē hei auē!

 

E hoe tō waka ki Ngāruawāhia
Tūrangawaewae mō te Kingitanga
(Ko) te tongi whakamutunga a Matutāera
Auē hei auē!

Tairi te aroha i aha ha
Toro mai ō ringa me aroha tāua
Auē Hikitia! Auē Hāpainga!
Auē hei auē!

Aha tīhei mauri ora Hi!