Taku Hōkioi noho hiwi maunga
Mātakitaki ki te papa o te whenua,
tūpana te haere o te waewae tangata,
papatahi ki te pae o Kui Apakura.
He tauhou te uri o Maui
ka riro ki te kurupae ki Kauwhata e...i.
Nā kōrua, ko te kete Aroiti
i whakatū te tū o te Tūmatakuru
arahina te eke ki te korokoro a Tū,
ka tau ki te kauwhanga nui
o te umu pokapoka e...hei!
Ka tū ki te taumata tapu
i te kororangi ki te kururangi o te mārama.
Ka rere te uru pounamu ki te ātea
Ko wai koe? I ahu mai koe i whea?
Kua haere mokomoko mai koe,
kua haere kukupā mai rānei?
Ko wai rā te atua
Nāna koe i turaki ki raro?
Ko wai rā te atua
Nāna koe i werohia kia huri wheraka?
Mēnā he hoariri, ka māringi te toto.
Kīhai koe i ākina ki te parāoa,
kīhai koe i werohia ki te tao roa
ka mate atu rātou o mua,
ko te toto, he whero, he māwhero, he parauri.
Mēnā he hoa aroha, nau mai haramai
ki rō te pouwhare o Kauwhata e...hei!
Hipa mai koe i te huinga o te rau
ko te amo o Wehiwehi,
ko te amo o Tahuriwakanui,
Ko Hinepare ki te pare.
Ka paopao te pouwhare ki te ngutu toa,
ka tīkina te kōrero o te whare ki te ngutu māreikura.
Ko te taonga ka riro ko te rau huia
hei tikitiki mō te māhunga.
Ka noho ngā rau ki rō te pouwhare,
kohikohia hei taonga mō te waka huia
Tiakina mō te wā iti nei kei ngaro noa
Hei...Hā!
